Unang Tinun-an ni Hesus, basahon and Juan 1:35-42
Usa Ka Gutlo nga Pangutana
Nakasulay na ba ka nga murag naay gamay nga tingog sa imong kasingkasing? Nagaingon kini nga “naa pa’y mas dako nga tumong para sa imoha”? Kana nga pagbati tinuod na. Basin tingog na sa Ginoo nga nagaimbitar nimo paingon sa usa ka mas lawom nga relasyon. Katuyuan nga Siya ra gyud ang makahatag.
Samtang nagsige ko’g basa sa Biblia, nagaampo ko nga makaila pa gyud ko kang Jesus. Pirmi ko mobalik sa istorya kung giunsa Niya pagtawag ang iyang unang mga tinun-an. Usa sa pinaka-makapukaw nga istorya ani makita sa Juan 1:35–42.
Usa Ka Balaan nga Panagtagbo
Nagsugod ang sugilanon nga kuyog si Juan Bautista sa duha sa iyang mga tinun-an. Pagkakita niya kang Jesus nga milabay, iyang gisulti:
“Tan-awa, ang Kordero sa Diyos!”
Dili na to unang higayon nga gisulti niya ni, pero karon, naay nahitabo. Ang duha ka tinun-an misunod dayon kang Jesus. Nakabantay si Jesus ug wala sila gisalikway—kundili giatubang gyud sila.
“Unsa inyong gipangita?” pangutana Niya.
Ning tubag sila:
“Magtutudlo, asa man ka nagpuyo?”
Ug nitubag si Jesus:
“Dali, tan-awa ninyo.”
Pero ang imbitasyon ni Jesus dili lang lugar ang gipasabot—kundili usa ka imbitasyon sa relasyon, pagpaila, ug pagbag-o sa kinabuhi.
Ang Isog nga Lakang sa Usa ka Igsoon
Ang usa sa duha ka tinun-an kay si Andres. Human sa ilang panagtagbo ni Jesus, milakaw dayon siya aron pangitaon ang iyang igsoon nga si Simon ug misulti nga:
“Nakita na namo ang Mesiyas” (nga buot ipasabot, ang Kristo)
Gidala dayon niya si Simon kang Jesus. Unya pagkakita ni Jesus kang Simon, Miingon Siya:
“Ikaw si Simon anak ni Juan. Apan karon, tawgon ka nga Cefas” (nga buot ipasabot, Pedro o “bato”)
Dili lang ni simpleng ngalan. Sa kasaysayan sa Biblia, kung ang Diyos mag-usab og ngalan sa usa ka tawo, simbolo kini nga aduna siyay bag-ong katuyuan. Kini usab nagrepresenta ug bag-ong pagkatawo. Usa ka pananglitan mao si Abram nga nahimong Abraham, ug si Jacob nga nahimong Israel. Gipakita ni Jesus kung unsa si Simon sa iyang panan-aw—usa ka “bato,” haligi sa pagtuo, pundasyon sa simbahan (Mateo 16:18). Gisuta ni Jesus ang kaugmaon ni Simon, bisan si Simon wala pa’y ideya.
Ang Tawag sa Diyos: Personal ug Punô sa Katuyuan
Kini nga hitabo sa Biblia nagpamatuod nga dili aksidente ang pagtawag ni Jesus sa unang mga tinun-an. Ang oras, ang mga tawo, ang ilang mga estorya—giplano ni tanan sa Diyos.
Hangtod karon, ang Ginoo nagatawag gihapon sa mga tawo nga musunod sa Iya. Ug kasagaran, sugod lang kini sa usa ka yano nga imbitasyon:
“Dali, tan-awa.”
Kung imong nabati nga murag gipaduol ka kang Jesus, ayaw balewalaa. Dili na aksidente. Sugod na kana sa imong tawag. Kabalô Siya sa imong ngalan, sa imong kinabuhi, ug sa imong abilidad—bisan dili pa nimo makita karon. Dili lang Siya gusto nga mutuo ka sa Iya gikan sa layo. Gusto Siya nga makiguban nimo, mulakaw uban nimo, ug mulihok sa imong kinabuhi.
Ang Akong Panahon sa Pagbalik
Naabot sa akong kinabuhi nga murag walay direksyon. Naglutaw-lutaw lang ko, nangita ug kasiguruhan. Niadtong panahona, giimbitar ko sa akong ig-agaw nga muuban sa simbahan. Hapít na ko mobalibad, pero naay murag gahum nga mipugos nako nga muadto.
Pag-abot nako sa sulod sa simbahan, daghang tawo ang nag-awit, nagataas sa ilang mga kamot—abri ang kasingkasing. Medyo na-overwhelm ko. Nag-observed ra ko, hilum, nga naghunahuna kung naa ba koy lugar didto.
Apan sa tunga-tunga sa pagdaig, kalit lang nako nabati—dili kahadlok, dili pressure—kundili kalinaw. Usa ka kalinaw nga murag yakap. Murag giingnan ko sa Ginoo:
“Welcome home.”
Dito nako nasabtan nga ako diay tong anak nga mihawa, ug dugay na ko gipaabot sa Ginoo. Niapil ko ug kanta ug nagsige’g hilak.
Sa tunga sa pagsimba, nabati nako ang tawag ni Jesus. Dili sa kusog nga tingog, apan sa hilum nga imbitasyon:
“Dali, tan-awa.”
Wala koy klaro nga tubag. Wala ko kabalo unsay sunod. Pero miingon ko og “Oo.”
Kana nga yano nga “oo” mao’y nagtuyok sa direksyon sa akong kinabuhi. Nagsugod kini sa bag-ong panaw. Paglingi nako karon, makita nako nga diha niadto nga panagtagbo nagsugod ang pag-ayo, tinuod nga katuyuan, ug relasyon nga hangtod karon nagkadugay ug nagkalalom.
Abri Gihapon ang Imbitasyon: Personal nga Tawag sa Pagsunod
Nagatawag gihapon ang Ginoo sa mga tawo karon—sama sa gibuhat Niya kaniadto. Ug kasagaran, nagasugod lang kini sa usa ka simpleng imbitasyon:
“Dali, tan-awa.”
Kung nabati nimo nga gusto kang makaila pag-ayo kang Jesus, ayaw kabalaka—sugod na na sa imong pagtawag. Kabalô Siya kinsa ka, unsay imong kasaysayan, ug unsay mahimo nimo—bisan dili pa nimo makita. Dili lang Niya gusto nga motuo ka sa Iya gikan sa layo. Gusto Siya nga makig-uban nimo. Gusto Siya nga bag-ohon ka. Gusto Siya nga itawag ka paingon sa usa ka kinabuhi nga mas labaw pa sa imong gilauman.
Unsaon Kini Pag-Apply sa Atong Kinabuhi Karun
Kini nga bersikulo nagpahinumdum nato sa tulo ka importante nga kamatuoran:
- Gitan-aw ta sa Diyos sa tinuod – Nakabalo Siya kung kinsa ta karon ug kung unsa ta mahimong sa Iya.
- Personal ang paanyaya ni Jesus – Dili lang tan-awon Siya gikan sa layo, kundi lakawan nato Siya ug pasudlon nato Siya sa atong kinabuhi.
- Makaplagan nato ang atong katuyuan pinaagi kang Kristo – ug sa pagpaambit Niya sa uban, sama sa gibuhat ni Andres kang Pedro.
Basin karon, wala ka kaila sa imong kaugalingon o unsa ang direksyon nimo. Pero sama kang Pedro, nakita ni Jesus ang “bato” nga naa sa imo. Luwas ang imong pagkatawo ug kaugmaon diha Niya.
Usa Ka Gutlo sa Pagpamalandong
Hunong usa ug pangutan-a ang imong kaugalingon:
- Gitawag ba ko ni Jesus karon nga muduol sa Iya?
- Unsay gamay nga lakang nga pwede nako buhaton aron mas masunod nako Siya?
- Kinsa kaha sa akong palibot ang naghulat lang nga sultian og, “Dali, tan-awa”?
Usa Ka Yano nga Pag-ampo
Ginoong Jesus,
Salamat kay nakita nimo ko—dili lang kung unsa ko karon, kundi kung unsa pa ko mahimong diha Kanimo.
Salamat sa imbitasyon nga makalakaw uban Kanimo ug makaila Ka pag-ayo.
Tabangi ko nga motubag sa imong tawag, ug ayaw tugoti nga kapuyon ko sa pagpangita sa Imo.
Sama kang Andres, hatagi ko ug kaisog. Dad-on ko ang uban diha Kanimo. Kabalo ko nga makausab Ka ug kinabuhi—apil ang akoa.
Sa ngalan ni Jesus, Amen.
Samtang nagsige ko’g paningkamot nga mailhan pa gyud ang Ginoo. Pinaagi sa Iyang Pulong, ginahangyo tamo nga kuyog ta sa panaw. Mangita ta sa Iya, dili lang aron mahibaw-an. Kundi aron masabtan ang atong pagkatawo, tawag, ug katuyuan nga giplastar Niya para sa matag usa nato.
Kung nakahikap ni sa imong kasingkasing, kuyog ta ani nga biyahe. Pwede ka mosubay, mokonekta, ug magpadayon ta sa pag-ila kang Jesus, adlaw-adlaw.
Immanuel and Me 
Leave a comment